Граѓаните со блокирани сметки ќе се распределат во други банки за помошта од 6.000 денари

Владата соопшти дека граѓаните коишто се со блокирани сметки, а ги исполниле условите за државната помош од 6.000 денари, согласно законот, се прераспределуваат во банка која има техничка можност да ги исплати средствата на засебна сметка.

„Ажурираната листа на корисници е објавена и поставени се сите категории на граѓани кои добиваат еднократна помош од 6.000 денари како мерка од 4-тиот пакет помош во време на пандемија со КОВИД-19. Во тек е процесот на обработка на приговорите. Граѓаните се упатуваат да ја проверуваат веб страницата www.kupuvamdomasno.gov.mk на која се ажурираат податоците така како што пристигнуваат од институциите во зависност од категориите на граѓани за кои се надлежни. Владата на Република Северна Македонија стори сé да ги ослободи граѓаните од административни процедури со цел средствата да стигнат до сите на кои им се потребни во најбрз можен рок, а средствата да може да се користат за она за што на граѓаните им се најпотребни.“, се наведува во соопштението.

Граѓаните чии сметки се блокирани треба да ги ажурираат податоците во банките најдоцна до петок (25 декември), и да ги подигнат парите, за да не им завршат кај извршителите. Банката не ги ослободува средствата од државна помош од активни или идни блокади по истекување на рокот (25 декември).