Грип: Вонредна дезинфекција – намалена бројка на заболени

На инфективното одделение во гостиварската болница се изврши вонредна дезинфекција како превентива од ширење на вирусот на грип. Пред почетокот на второто полугодие, истото беше направено и низ училиштата во Гостивар. Според информациите од епидемиолошкото одделение, останати се неколку училишта во планинските села каде поради снегот дезинфекцијата е одложена и ќе се спроведе кога ќе се создадат услови.

Во меѓувреме, состојбата со грипот во гостиварскиот регион се стабилизира. За разлика од првата недела од јануари, кога беа регистрирани скоро 700 заболени, минатата недела имало 200 пациенти заразени со вирусот. Лекарите, водени од искуствата од претходните години очекуваат дека и покрај намалувањето, грипот нема сосема да стивне. Ги потсетуваат граѓаните да одржуваат високо ниво на хигиена и да конзумираат храна богата со витамини.