Грипот во сенка на коронавирусот – значително помалку грипосани од лани

Вообичаено во овој период од годината меѓу населението се ширел грип и се регистрирале зголемени бројки на заболени. Но, оваа сезона се чини коронавирусот го фрли во сенка грипот. Според анализите на Институтот за јавно здравје, во сезоната 2020/2021 вкупниот број на заболени од грип изнесува 379 што е 54,2% помалку во споредба со истиот период минатата сезона, кога имало 828 заразени и 70,1% помалку во однос на типичната сезонска крива која изнесува 1.266 грипосани.

ИЈЗ соопшти дека во периодот од 28 декември до 3 јануари во земјава пријавени се 24 случаи на групни пријави за заболени од грип/ заболувања слични на грип.

Заболените се пријавени во Дебар – 15, во Кичево – 5, во Струмица – 2 и во Куманово и Прилеп – по 1.

Во однос на возрасната дистрибуција, 11 лица се од возрасната група од 15-64 години, а највисока инциденца се регистрира кај најмладите, децата на возраст од 0-4 години.

За сезоната 2020/2021, Министерството за здравство набави бесплатна четиривалентна вакцина во вкупна количина од 40.000 дози, наменета за приоритетните групи население.

Заклучно со 53-та недела, вакцинирани се вкупно 37.221 лица со бесплатна вакцина.

Дополнителни дози вакцина се набавени од страна на Центрите за јавно здравје, како вакцини за останатото население кое не спаѓа во горенаведените групи и истите можат да се добијат за одреден финансиски надомест како комерцијални вакцини.

Во однос на комерцијалните вакцини, согласно достапните податоци од извештаите на Центрите за јавно здравје, вакцинирани се 8.993 лица.