Гужва на Богородица и на Табановце, граѓаните патуваат за продолжениот викенд

Многу граѓани решија продолжениот празничен викенд да го поминат  надвор од државата. На граничните премини се бележат гужви и има чекање.

Според информациите од АМСМ, на граничните премини Богородица и Табановце поради зголемена фреквенција на возила времето на чекање за излез од државата е до половина час.

Сообраќајот на државните патишта се одвива непречено, по претежно влажни коловози, а интензитетот на сообраќај на патните правци надвор од градските средини е зголемен.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.