Гужви за пасоши – се поднесуваат по осумдесетина барања дневно

На шалтерите на службата за издавање на патни исправи во Гостивар периодов „врие“ од народ. Дневно се поднесуваат по осумдесетина барања, а се очекува бројката уште повеќе да порасне со оглед на доаѓањето на печалбарите во родниот крај.

Според податоците кои ги добивме од Министерството за внатрешни работи, во првата половина на јули биле поднесени околу 1.150 барања за пасоши, од кои скоро 250 за издавање по итна постапка, што чини педесетина евра плус. Во истиот период скоро 400 граѓани поднеле барање за лична карта.

Претходниот месец, во јуни, вкупниот број на поднесени барања за патни исправи изнесува 1.737, од кои 275 по забрзана постапка. Нови лични карти во јуни побарале  605 гостиварци.
Значително зголемување на интересот за добивање лични карти и патни исправи, регистрирано е и на тетовското подрачје.
Минатиот месец во тетовските служби биле поднесени 1.172 барања за лични карти, 2.538 за патни исправи во редовна и 387 во итна постапка. Во првата половина на јули пак, поднесени се околу 700 барања за лични карти и над 2.000 за патни исправи, од кои скоро 400 по итна постапка.