Хуманитарен хепенинг под маски во ОУ „Единство“

Дворот на гостиварското училиште „Единство“  денес се претвори во весело, шарено место со многу насмеани и задоволни детски лица. Училиштето заедно со Клубот на млади на Црвениот Крст организираше хуманитарен настан на кој основците продаваа свои изработки, колачи, украси, а воедно се забавуваа маскирани во своите омилени ликови од приказните и цртаните филмови.

„Би сакала да изразам огромно задоволство за големиот одзив и за изработеното што е резултат на трудот на дечињата, наставниците и родителите. Нашето училиште и понатаму со задоволство ќе продолжи да организира настани кои ја поттикнуваат хуманоста и креативноста кај децата“, изјави Јасмина Василеска, пом.директор на ОУ„Единство“ во Гостивар.

Активноста се спроведе како дел од Програмата за промоција на хумани вредности на Црвениот Крст од Гостивар. „Ова е еден од проектите од ПХВ програмата, а иницијативата ја покренаа група средношколци од медицинското училиште. Собраните пари ќе се донираат на социјално загрозени семејства и Дневниот центар за деца со посебни потреби“, рече Бурхан Клинче, претседател на Клуб на млади на Црвен Крст

На вредните и хумани дечиња и волонтери им се придружија и децата од Дневниот центар за лица со посебни потреби во Гостивар во знак на одбележувањето на Светскиот ден на аутизмот.