Голема хуманитарна забава во сабота во Пабот!

Дарувајте од срце, приклучете се на хумана иницијатива и забавувајте се со добра музика во опуштена атмосфера. Со оваа порака ги повикуваме гостиварци, во што поголем број, да бидат дел од саботната хуманитарна забава, што ќе се одржи во The Pub. Настанот се прави со цел да им се помогне на повеќе социјално загрозени семејства од Гостивар, кои се соочуваат со тешко секојдневие и живеат во сиромаштија.

Хуманитарната забава заеднички ја организираат бендот Soundcheck, општинската организација на Црвениот Крст од Гостивар и The Pub. Нашиот портал Gostivarpress.mk се вклучи во иницијативата, како медиумски покровител.

„Желбата да подадеме рака на наши сограѓани на кои најмногу им е потребна помош, не донесе до идеја да ги споиме силите и да направиме една забава од ваков тип. Со собраните пари ќе се обезбедат пакети со храна за социјално загрозени семејства“, велат организаторите.

Бендот Soundcheck ќе го донира својот хонорар од свирката, The Pub ќе донира 20% од вкупниот промет, а Црвениот Крст ќе обезбеди специјални кутии во кои секој гостин ќе може да донира во рамки на своите можности.

Забавата започнува во 21 часот.