Хуманоста на гостиварци на дело – собрани 40-тина единици на крв во денешната акција

Граѓаните на Гостивар уште еднаш ја покажаа својата хуманост и солидарност на дело. Во денешната крводарителна акција што ја спроведе гостиварскиот Црвен крст, во соработка со службата за трансфузиологија беа собрани 40-тина единици на крв. Организаторите велат дека се задоволни од одзивот и најавуваат нови акции за дарување на крв во следниот период.

„Очекуваме до крајот на годината да реализираме уште неколку крводарителни акции и тоа низ средните училишта и во Полициската станица. Со тоа, се надеваме дека ќе го исполниме годишниот план, од околу 1.400 до 1.500 единици на крв.“ изјави  Алмир Мухареми од Црвен крст-Гостивар

Секој здрав човек треба да се вклучи во акциите и да дарува крв, со што дирекно придонесува да се спаси нечиј живот, порачаа од Црвениот крст, нагласувајќи дека Гостивар со околните општини е на врвот на листата во земјава по крводарување.

Црвениот крст Гостивар, секоја година изразува посебна благодарност и почит кон активните крводарители и доделува признанија и благодарници за јубилејни дарувања. Годинава беа доделени на над 160 хумани граѓани, крводарители.