И тоалетот има свој ден

Може да се качите или да се симнете од автобус, да одите на работа или да не одите, да посетите лекар или да ја избегнете ординацијата – се тоа се прашања по избор. Но, има едно место каде што дури и „царот оди пеш“. Тоа е тоалет.

Во чест на оваа просторија, установен е Светски ден на тоалетот и се славеше вчера.

Додека некои градови, како што е шпанскиот Ел Вандрел, поставуваат јавни тоалети за кучиња, многумина сеуште кубурат со јавните тоалети. Состојбата не е многу подобра ниту во нашиот град. Во Гостивар има еден до два јавни тоалети и претежно се руинирани и out of service. Затоа, ако некој е принуден да го стори тоа, самиот нека му ја мисли каде да се олесни. За машки – женски тоалети, воопшто и да не започнуваме. Заклучок, во Гостивар нема јавни тоалети, а нема ни мобилни тоалети. Ако згусне, снаоѓајте се кој како знае..

Олеснителна околност, ние не сме сами по ова прашање. Според Обединетите нации за 2016 година, околу 2,4 милијарди луѓе ширум светот немаат пристап до тоалети.

Инаку, првите вц школки биле користени во Кина. Археолозите во близина на Шангај, откриле школка со наслон стара повеќе од 2.000 години. Ве-це даска пронајдена е и во стар Египет. Техниката први ја имаат развиено римјаните, поставувајќи заеднички тоалети над поток. Во феудална Европа, богатите имале тоалети на високо, на врвовите во кулите, а во тоа време започнал да се користи и славниот нокшир. Првиот тоалет со вода е изграден специјално за Елизабета Прва. Дизајниран од Сер Џон Харингтон.

19 ноември, Светски ден на тоалетот.