Идентификувани двајцата македонски туристи што се удавија во Драч

Индентификувани се двајцата македонски туристи кои денеска на пладне се удавија на плажата Спиле, кај албанското пристаниште Драч.  

Како што пренесува Топ чанел, станува збор за Ристе Дамковски (80) и Цветко Митановски(78) и двајцата од Битола, кои шест години по ред оделе на одмор токму на оваа плажа. 

Биле дел од група од 52-ца македонски туристи кои пред четири дена пристигнале во Драч. 

-Откако ручале, тројца од групата влегле во морската вода, но само еден од нив успеал да излезе жив. Една од жртвите, Митановски, боледувал од срцеви болести, наведува телевизијата. 

Трагичниот настан се случил околу 11:25 часот на јавна плажа, на која немало набљудувач. Едно од телата го забележал набљудувач од соседната плажа, по што интервенирал, а откако влегол во водата го забележал и другото тело. 

Најпрво присутните на плажата им дале срцева масажа, но и брзата помош, која веднаш стигнала, не успеала да ги врати во живот. Првичните информации потврдуваат дека причината за смртта е срцев удар.