Иницијативата „Учебници и настава мора да има“ најави протести

Од граѓанската иницијатива „Учебници и настава мора да има“ денес најавија протести низ градовите во Македонија и марш во Скопје, кои ќе се одржат во сабота. Протестите се знак на незадоволство од воведувањето дигитални учебници и новиот предлог-закон за образование.

„Почнуваме со организирани мирни протести во градовите и мирен марш во Скопје, во сабота 15 мај со почеток во 12 часот. Потоа, продолжуваме со поднесување на граѓанска иницијатива за задолжителен референдум против овој избрзан закон“, рече Драгана Спасевска, координатор на иницијативата.

Бојкотот на наставата прекинува. „Согласно ставот на мнозинството родители, бојкотот ќе биде прекинат, на децата им остануваат уште малку денови од учебната година, да не трпат притисоци и стресови“, рече Спасевска.