Институциите и организациите во Гостивар здружено против семејното насилство: Препознај, обрати се и стоп за домашното насилство!

Унапредување на системот на заштита, пристапот до информации и директната помош и поддршка за жените жртви на семејно насилство-ова се целите на проектот „Препознај, обрати се и стоп за домашното насилство“, којшто се спроведува во Гостивар веќе неколку месеци. Во негови рамки формирано е мултисекторското тело со претставници од: Центарот за социјална работа, Судот, Здравствениот дом, локалната самоуправа, полиција, образовни институции и грѓански организации.

„Мултисекторското тело има за  цел да ја подобри соработката помеѓу институциите  даватели на услуги на жртви од семејно насилство и граѓанскиот сектор,  со цел да  се овозможи  координиран пристап и постапување на релевантните чинители против сите видови на родово базирано и семејно  насилство. Функционирањето на ова мултисекторско тело е од особено значење, бидејќи практиките покажуваат дека координираното делување на институциите со сигурност може да им помогне на жените жртви,  кои веќе се охрабриле да го пријават насилството и се одлучиле да ја напуштат насилната средина.“, подвлече Маја Христовска, од здружението Иницијатива за граѓански интеграции ИГИ Гостивар, кое го имплементира проектот со поддршка на ЕУ Механизмот за граѓанска отпорност.

Мултисекторското тело спроведува повеќе видови на активности: аналитичко – истражувачки преку анкети на населението со цел да се процени распространетоста и трендовите на сите форми на насилство опфатени со Истанбулската конвенција, потоа јавно застапување, превентивно и информативно – едукативни активности за жените и општата јавност, со посебен акцент на жени и девојки жртви на родово базирано насилство, превентивно – едукативни активности во образовни институции и работа со млади, како и јавни кампањи.

Во склоп на проектот воспоставена е и платформа Femini force, дигитален сервис кој им обезбедува соодветни услуги на жртвите од родово базирано и семејно насилство.

„Оваа активност се заснова на личен пристап кон жртвите и целата комуникација и портфолио за обезбедени услуги и побарана помош останува во доверба исклучиво помеѓу давателите на услуги и корисничката на услуги.  Дополнително, на платформата сите граѓани можат да најдат информации за законските можности за заштита од семејно насилство,како и информации и совети од финансиски и практични прашања и ризици од понатамошна виктимизација.“, вели Христовска.

Според официјалните податоци од институциите во 2021-ва година на подрачје на Гостивар евидентирани се 121 жртва на семејно насилство, од кои повеќето биле жени.