Институциите во Гостивар дискутираа за состојбите во сообраќајот и безбедноста

Локалниот совет за превенција на Гостивар, во кој учествуваат претставници на институции со различни надлежности, денес одржа прва седница. Во средиштето на дискусиите се најдоа состојбите во сообраќајот, безбедноста на граѓаните, како и заштитата од пожари, особено во летниот период што е пред нас. Како што најавија од локалната самоуправа, за време на престојот на печалбарите, за да се растовари сообраќајот низ градските улици, дворовите на училиштата ќе бидат отворени за бесплатен паркинг.

„Во оваа прилика заедно со релевантни локални институции разговаравме за општинскиот аспект и сообраќајот за време на престојот на иселениците во татковината и противпожарната заштита во летниот период. Апелирав за време на престојот на нашите сонародници во татковината, институциите да бидат во нивна служба, граѓаните во тој период помалку да користат автомобили, а училишните дворови да се користат како јавни бесплатни паркинзи.“, истакна градоначалникот Арбен Таравари.

Локалниот совет за превенција се реализира преку проектот „Со локалните совети за превенција кон подобра соработка“, кој го спроведува Евротинк-Центарот за европска стратегија, поддржан од Амбасадата на САД во Скопје. Советот вклучува претставници од општината, полицијата, јавните претпријатија, противпожарната единица, Дирекцијата за заштита и спасување и др.