Интересна вест од Загреб, основан е КК Динамо

Интересна вест доаѓа од Загреб. Кошаркарскиот клуб Рудеш од хрватскиот главен град доби ново име и тоа по примерот на актуелниот фудбалски шампион. Сепак, новоформираниот кошаркарски клуб Динамо, нема никаква административна врска со фудбалскиот клуб, меѓутоа хрватските медиуми наведуваат дека на почетокот ќе ја има поддршката од најтврдокорните навивачи на фудбалскиот клуб, популарните “Bad Blue Boys“, а и амблемот многу наликува на оној на фудбалскиот клуб.

Спортските медиуми пишуваат дека позади овој нов кошаркарски проект, стојат сериозни луѓе и дека еден од нив е прославениот кошаркарски тренер Невен Спахија, кој и го издаде соопштението за јавноста.

“Мојата работа е кошарката, а кошарката во Рудеш сега и во Динамо, се сфаќа сериозно. Едукација на тренерите и стручниот кадар, една е од моите основни и редовни задачи кои со радост ги извршувам. Многу сум горд што сум дел од амбициозна средина“, напиша Невен Спахија во соопштението за новиот кошаркарски клуб Динамо.