Интересот за вакцинирање расте, пристигнаа нови количини од Синофарм и Астра Зенека

Интересот за вакцинација против коронавирус секојдневно се зголемува, соопштуваат од Министерството за здравство. Досега преку веб платформата vakcinacija.mk се пријавиле над 346 илјади граѓани. На вакциналните пунктови во државата заклучно со вчера, вакцинирани се вкупно 203.324 лица, а ревакцинирани се речиси 25 илјади граѓани. Според последните статистики 35% од населението над 70 години имаат примено барем една доза вакцина против коронавирус.

Вчеравечер во земјава пристигнаа 38.400 вакцини од производителот Астра Зенека кои се обезбедени преку Ковакс механизмот. Овие вакцините ќе бидат наменети за ревакцинација и вакцинација на граѓани над 60 години.

Утрово пристигна пратка од 100.000 вакцини од Синофарм, кои се донација од НР Кина. Со нив ќе продолжи вакцинирањето на Армијата и во Министерството за одбрана, а поголем дел ќе бидат отстапени на јавното здравство за вакцинирање на граѓаните.