Интернационални успеси на ученици од „Јахја Ќемал“ – Гостивар

Ученици од приватното средно училиште „Јахја Ќемал“ во Гостивар изминатите денови учествуваа на престижни меѓународни натпреварувања од каде се вратија со повеќе награди.

На натпреварот по информатика во Романија кој има 15 години традиција, учениците од Гостивар освоија златен и сребрен медал. Тие учествуваа со оригинални проекти, преку кои ги покажаа своите вештини и знаења од област на информатиката.

„Сакам да потенцирам дека нашата мисија е учениците да ја градат својата иднина преку знаењето. Тие мора да учат и да се мотивираат за поголеми успеси. Ако сакате во иднина да станете добар инженер, лекар, професор мора да вложувате во своето знаење од млади години. Во Романија постигнавме голем успех и горди сме на освоените прво и второ место. Конкуренцијата беше силна, затоа што се работи за натпревар кој важи за престижен и познат не само на Балканот, туку и за целиот свет. Ние таму учествувавме со вкупно 18 проекти од кои за два добивме златен и сребрен медал“, изјави професорот ментор на учениците Бајрам Којунџу.

На натпреварот по информатика во Романија годинава учествуваа вкупно 572 ученика со 357 проекти од 45 земји ширум светот меѓу кои: Америка, Јужна Африка, Мексико, Кина и други. Постигнатите резултати на учениците од „Јахја Ќемал“ придонеле Македонија да се рангира на второто место како држава.

Колеџот бележи успех и на натпреварот по англиски јазик во Сараево, Босна, каде што годинава учествуваше по прв пат. Таму учениците освоиле пехар за второ место, како и сребрен и златен медал во различни категории како дебата, квиз и есеј на англиски јазик