Инцидент во гостиварската гимназија, Алијанса за Албанците и ДУИ со меѓусебни обвинувања

Инцидент кој се случил попладнево околу 14.30 часот во  гимназијата во Гостивар го потпали огнот на нетрпение меѓу гостиварските ограноци на Алијанса за Албанците и на ДУИ. Според првичните информации од полицијата, во дворот на гимназијата е регистриран случај на нарушување на јавниот ред и мир во кој учествувале четири лица, двајца вработени во училиштето и две други лица. Имало и физички напад на кој му претходела вербална расправија, а кој завршил со повредено лице.

Од Алијанса за Албанците обвинија дека во гимназијата биле нападнати двајца професори по инструкции на ДУИ и актуелниот директор на училиштето Џези Камбери и дека мотивите биле политички. „Ги повикуваме Заев, Спасовски и Дескоска да ги запрат бандитите на ДУИ во Гостивар, а надлежните институции да го санкционираат ваквото однесување“, изјавија од Алијансата.

Со своја реакција излегоа и од огранокот на ДУИ. Според нив, двајцата професори биле тие кои го нападнале директорот на гимназијата. „Го осудуваме ваквото однесување на двете лица кои се партиски активисти на Алијансата и ја повикуваме меѓународната заедница внимателно да ги следи бандитските активности на Таравари и неговите луѓе“, се вели во соопштението на ДУИ.

Од Секторот за внатрешни работи информираат дека случајот е во фаза на расчистување, се утврдуваат поединостите, видот и карактерот на повредите и се друго. Со повеќе информации ќе излезат во текот на утрешниот ден.

Џези Камбери, кадар на ДУИ е еден од директорите кои беа вратени на раководните места во училиштата откако Министерството за образование му ги одзеде надлежностите на градоначалникот.