Италијански спелеолози во Гостивар – наскоро виртуелна 3Д тура низ пештерата Убавица

Група спелеолози од Италија престојуваат во Гостивар со цел да ја истражуваат пештерата Убавица во Горна Ѓоновица и да обучат нивни гостиварски колеги за подобро управување и заштита на пештерата.

Активноста е дел од проектот за зајакнување на локалните актери за истражување и конзервација на природното наследство на Убавица, што го спроведува Спелеолошкиот клуб Кораби од Гостивар во соработка со општината.

„За мене нешто многу значајно и трајно е што ќе се овозможи и виртуелна тура во внатрешноста на пештерата. Така и оние кои не можат да ја посетат, ќе може да ја разгледаат и да уживаат во природните убавини“, рече Јетон Османи, претседател на клубот.

Матео Тарталини, спелеолог од Италија нагласи дека со задоволство ќе ги споделат своите искуства со локалните спелеолози. „Овој проект, за нас претставува нешто многу големо и значајно. Подготвени сме да ги пренесеме нашите искуства на овдешните спелеолози. Ќе се фокусираме да споделиме што е можно повеќе знаење и вештини.

Градоначалникот Арбен Таравари, кој ги прими спелеолозите денес во својот кабинет, изрази надеж  дека со проектот ќе се збогати туристичката понуда на Гостивар.

Проектот за истражување и заштита на пештерата Убавица финансиски е поддржан од Европската Унија со околу 76 илјади долари.