Избори во Италија: Крајната десница доаѓа на власт

Џорџа Мелони, лидерката на екстремно десничарската партија „Браќа на Италија“ која според прелиминарните податоци e победник на изборите во Италија, најави дека ќе ја предводи следната италијанска влада.

„Италијанците испратија јасна порака за десничарска влада предводена од Браќата од Италија. Ќе владееме за сите. Ќе владееме за да го обединиме народот“, рече Мелони во синоќешното кусо обраќање пред новинарите.

Коалицијата формирана заедно со другата екстремно десничарска евроскептична партија „Лига“ на Матео Салвини и со конзервативната партија „Форца Италија“ на поранешниот премиер Силвио Берлускони ќе има околу 43 отсто од гласовите, што и обезбедува апсолутно мнозинство во Претставничкиот дом и во Сенатот на италијанскиот парламент.

Излезната анкета на „РАИ“ предвидува дека таа ќе освои меѓу 22 и 26 отсто од гласовите, пред нејзиниот најблизок ривал Енрико Лета од левиот центар. Неколку останати изборни анкети и даваат предност на десничарската коалиција од 41 до 45 проценти од гласовите.

Доколку бидат потврдени изборните резултати, Мелони ќе ја формира најдесничарската влада во Италија од Втората светска војна.