„Изборот на 15-ти јули е меѓу еснаф или криминал“, порача Стојаноска, носител на листата од Коалицијата „Обнова на Македонија“

Во денешната агенда од предизборната кампања во 6-тата изборна единица на Коалицијата „Обнова на Македонија“ предводена од ВМРО ДПМНЕ, беше посета на слаткарскиот еснаф во Гостивар. Зборувајќи за симболиката на зборот еснаф како чесност, носителката на листата, Дафина Стојаноска нагласи дека на денот на гласањето, граѓаните треба да направат избор помеѓу еснафот и криминалот.

„Седнавме на по една баклава во една од најстарите и најреномираните слаткарници во Гостивар, Рекорд. Газда Абдуљади е еден од вистинските гостиварски еснафџии. Овој збор значи многу за секој вреден гостиварец и приватн стопанственик. Еснафот како збор кај нас значи чесност. Жалам што изминатите две години имавме премиер без „е“ од еснаф. Што се однесува до „е“ од европски вредности за кои велеше дека се неговиот пат, ни останаа само „евро“ за бате и „евро“ за црквата, како и она негово „е“ што им го порача на македонскиот народ и сите негови соработници. Затоа на 15-ти јули, изборот е помеѓу еснафот и криминалот, помеѓу чесноста и искривената кичма. На 15 јули заокружете број 14 за исправена Македонија“, рече Стојаноска.

Активностите на Коалицијата „Обнова на Македонија“ денес во Гостивар продолжуваат со средба со граѓани во градскиот парк.