Издвоени буџетски пари за “ФК Гостивар” и “КК Гостивар 2015”

Фудбалскиот клуб „ФК Гостивар“ и кошаркарскиот „КК Гостивар 2015“ ќе добијат финансиска инекција од општината. На последната седница на општинскиот Совет, беше донесена одлука за доделување на парични средства за помош и поддршка на двата спортски клуба.

Сметката на „ФК Гостивар“ ќе биде освежена со сума од еден милион денари, додека за кошаркарите ќе се издвојат 300 илјади денари. Парите се обезбедени од буџетот на општина Гостивар.

Фудбалскиот клуб Гостивар, кој до пред некоја година беше дел од елитното фудбалско натпреварување, во моментов се натпреварува во Третата лига – запад. Полусезоната ја заврши на првото место и се надева на експресно враќање во Втората лига.  Кошаркарскиот клуб Гостивар 2015 се натпреварува во Втората кошаркарска лига. Првиот дел го заврши без ниту еден пораз, убедливо на првата позиција која носи директен пласман во Првата кошаркарска лига на Македонија.