Изградени се околу 25% од новиот систем за наводнување Равен-Речица

Една година од почетокот на изградбата на системот за наводнување Равен-Речица, завршени се околу 25% од проектот. Увид во градежните работи, близу врапчишкото село Топлица, денес извршија министерот без ресор Хисен Џемаили, државниот секретар на Министерството за земјоделство, Нефрус Челику и директорот на водостопанство, Славе Арсовски.

„Системот опфаќа над 3.300 хектари земјоделска површина во полошко. Се работи за нов, модерен, затворен систем за наводнување, и ова е навистина еден крупен проект од кој придобивки ќе имаат сите жители кои се занимаваат со земјоделие од целиот полошки регион“, рече Челику.

Надлежните рекоа дека се задоволни од текот на работите, иако на гостиварската територија се соочиле со потешкотии околу експропријација на земјиште.

„Веруваме дека проектот ќе се заврши навреме, иако многу зависи од временските услови. Се соочивме со некои помали проблеми со експропријацијата, иако од наша страна целокупно е завршена целата постапка, во тетовскиот дел експропријацијата се одвива нормално, во гостиварскиот имаме мали потешкотии, но верувам дека ќе се надминат.“, изјави Арсовски.

Денешниот увид во работите беше дел од низата активности на Владата во полошкиот регион, кои претходат на одржувањето на владина седница во Тетово.

„Целта е да бидеме што поблиску до граѓаните, да ги видиме проектите што се во тек на реализација, како и да го слушнеме нивното мислење околу тоа што перспективно може да се направи во секој регион“, изјава министерот Џемаили.

Со системот за наводнување Равен-Речица ќе се наводнува земјоделската површина што се протега од десната горна страна на автопатот Тетово – Гостивар до подножјето на Шар Планина. Предвидено е да биде опфатена и дополнителна површина од 300 хектари, која се наоѓа под автопатот, во атарот на Горно Седларце.

Проектот треба да се заокружи во период од 5 години.