Изјава на Кашмир Салиу од ДСР – Кои се причините за поддршката на ДУИ и СДСМ?

Советникот од Демократските сили на Ромите, Кашмир Салиу по завршувањето на денешната седница на Советот на општина Гостивар даде изјава во која ги образложи причините за одлуката да ја поддржат коалицијата ДУИ- СДСМ и да влезат во мнозинството на советот, иако на локалните избори коалицираа со ВМРО ДПМНЕ.

„Од конститутивната седница нашата партија и јас бевме на тапет на целата јавност за случувањата на локално ниво. Сакам да кажам дека одлуката да ја поддржиме коалицијата на ДУИ, СДСМ и НДП на Весел Мемеди беше донесена на централно ниво на нашата партија во консултации со општинската организација во Гостивар поради односот на ВМРО ДПМНЕ. Нивната советничка група се пазареше со актуелниот градоначалник за неколку директорски и заменички места, а колачот не сакаше да го дели со ромската партија. Ние од конститутивната седница дејствуваме како Демократски сили на Ромите. За тоа што не обвинуваат од ВМРО ДПМНЕ дека ние не сме биле легитимни и дека не сме придонеле за гласови на локалните избори, сакам да им порачам: нека си ја видат разликата во гласови на советничката листа и нивниот кандидат за градоначалник, има 1.200 гласови.  Ние како партија во Гостивар имаме 1.500 членови. Сметаме дека овој чекор што го презедовме на долгорочни патеки позитивно ќе се рефлектира на ромската заедница во Гостивар “, изјави Салиу.

Мнозинството во Советот на општина Гостивар беше формирано токму со гласот на советникот од ДСР.