Излетниците да не палат огнови, возачите да не возат пребрзо и да не пијат алкохол – апели од полицијата во пресрет на продолжениот празничен викенд

Секторот за внатрешни работи Тетово, во пресрет на продолжениот празничен викенд, со апел до граѓаните целосно да се придржуваат кон владините и мерките, советите и утврдените протоколи од здравствените власти за спречување на ширењето на коронавирус.

Секое непочитување на мерките повлекува законски предвидени санкции, а неретко може да резултира, исто така, и со несакани лични и семејни здравствени последици, укажува СВР.

„Излетниците, чиј број претстојниот викенд ќе се зголеми на подрачјето, се потсетуваат да не палат огнови на отворен простор, кои можат да предизвикаат несакани материјални и други последици и кои можат да загрозат и човечки животи. Возачите, пак, се советуваат да ја прилагодат брзината според условите на патот и да се воздржат од конзумирање на алкохол, дотолку повеќе што наредните денови се очекува зголемена сообраќајна фрекфренција, особено на патиштата кон Охрид, Маврово и по долината на Радика.“, соопшти полицијата.

Отсекот за превенција на СВР Тетово неделава оствари неколку непосредни средби со верските заедници на подрачјето, на кои заеднички била истакната потребата од доследно почитување на мерките за заштита од „ковид-19“ и во верските објекти и надвор од нив, а во функција на зачувување на здравјето на граѓаните од регионот и пошироко.