Изложба на гостиварскиот уметник Бурхан Ахмети во Скопје

Синоќа во националната галерија Чифте амам во Скопје беше отворена самостојна изложба на гостиварскиот ликовен уметник Бурхан Ахмети. Пред публиката се изложени графики и дела изработени во комбинирана техника на платно.

– Делата на Бурхан Ахмети се карактеризираат со изворна афирмација на сложените графички техники, како сува игла, акватинта, линорез, литографија, дрворез, бакрорез, монотипии, па сè до дигиталната графичка дисциплина, како и со нагласена интелектуалност во пристапот кон визуелната уметност, оцени кустосот Татјана Бундалевска, од Националната галерија на Македонија.

Делата кои се дел од изложбата на посетителите ќе им ја доловат убавината на индивидуалното уметничко дело, традицијата, луѓето, нивните социјални врски, нивните очекувања и копнежи.

Бурхан Ахмети е роден на 18 август 1978 година во гостиварското село Дебреше. Член е на ДЛУМ, добитник неколку награди, учесник на околу стотина ликовни колонии, има реализирано многубројни самостојни и групни изложби. Изложбата во Чифте амам ќе биде отворена до 17 декември.