Изминатите 24 часа во Гостивар нема нов позитивен на корона, во Македонија 29 новозаболени

Според податоците од Министерството за здравство, во изминатите 24 часа потврдени се 29 нови случаи. Најголемиот дел од нив се во Скопје (22), па потоа  Штип (3), Дебар (2), Куманово (1) и Охрид (1). Во Гостивар изминатото деноноќие не е регистриран нов позитивен пациент со Ковид 19.

Вкупната бројка на заболени од коронавирус во земјава достигна 114. Според местото на живеење, досега потврдени случаи на коронавирус има во градовите: Скопје (65), Дебар (36), Штип (7), Кавадарци (2), Охрид (2), Гостивар (1), Куманово (1).

„На Клиниката за инфективни болести и фебрилни состојби во моментов се хоспитализирани 24 пациенти. 7 пациенти се континуирано на третман со кислород, 11 се веќе во стабилна – добра здравствена состојба. Утре, по истекот на 14 дена од поставување дијагноза, кај 6 пациенти ќе се зема контролен брис. Од нив 5 се во добра состојба, а кај пациентката кај која имаше влошување нема промена на состојбата и таа сѐ уште е на респираторна машина. Пациенти кои се на домашно лекување се во постојан контакт со лекарите.“, информира Министерството за здравство.