Јавна дебата: Ризичните дрвја во гостиварскиот парк да се исечат и донираат на сиромашни семејства

Јавното претпријатие за паркинзи и зеленило во Гостивар, периодов интензивно работи на уредување на големиот градски парк, кастрење и сечење на дрвја, оплеменување со нови садници, поставување на осветлување на цветните оази и слично.

Од таму најавуваат дека деновиве ќе организираат јавна дебата за отстранување на неколку стари дрвја. Велат дека се работи за поголеми дрвја, што се исушени со надвиснати гранки и претставуваат ризик за граѓаните коишто поминуваат оттука. Надлежните процениле дека стеблата треба да се исечат за да се намали ризикот, но сакаат да го слушнат и ставот на граѓаните.

„Ќе имаме јавна дебата, ќе ги поканиме невладините организации и граѓаните да го искажат своето мислење. Тоа се стари, исушени дрвја кои навистина се голема опасност за минувачите.“, вели Беким Челебиу, директор на ЈП за паркинзи и зеленило.

Целата иницијатива има и хуманитарен карактер. Претпријатието планира исечените дрвја да ги донира на социјално загрозени семејства од Гостивар за огрев. Се предвидува и празните површини да бидат разубавени со нови садници.

Освен во паркот, актуелно екипи на ЈП работат и на уредување на зелениот појас на булеварот „Браќа Ѓиновски“. Во план се и други проекти, а надлежните велат дека активностите на терен ќе траат се` додека има поволни временски услови.