Како да ја победите несоницата?

Некои луѓе имаат таква среќа да заспијат веднаш штом ја спуштат главата на перница. За други, заспивањето оди тешко, трае со часови, создава нервоза и го мачи целиот организам. Ако сте од тие вторите, наместо да посегнувате по таблети за спиење, обидете се да делувате на природен начин, со промена на навиките и придржување до неколку правила.

-Првото и најважното на кое не учеле и родителите како деца е: секогаш да се легнува во исто време навечер. Така организмот ќе се програмира самиот дека тоа е времето кога треба да мирува и да заспие. Не е лесно и треба време за навикнување, но речиси кај сите кои биле упорни на крај успева.

-Пред да легнете проветрете ја просторијата кадешто спиете. Свежиот воздух ги смирува телото и мозокот.

-Доколку се бавите со физичка активност, никако не го правете тоа навечер. Часовите пред легнување треба да бидат исполнети со друг тип на активности како: читање на книга, гледање ТВ, разговор со домашните.

-Запаметете дека креветот е место за спиење, затоа тргнете ги од таму што подалеку телефонот, таблетот и слично. Едноставно кога легнувате, мислете дека тоа е вашето царство на соништата.

-Од вечера до легнување нека поминат барем 2 до 3 часа. Ако чувствувате глад пред спиење напијте се чаша топло млеко или чај од мајчина душичка.

-За уредување на спалната соба одберете бои кои ве смируваат. Тоа секако се однесува и на постелнината, која мора да биде пријатна и мека.

-Кај некои луѓе тивката амбиентална музика помага за добар сон.

-И на крај испразнете ја главата од разни мисли. Утрото е помудро од ноќта!