Како Google го добил името?

Зад именувањето на најпознатиот пребарувач се крие интересна приказна која е малку позната.

Кон крајот на `90-тите години Лари Пејџ и Сергеј Брин, студенти на Универзитетот Стенфорд во Калифорнија креирале интернет пребарувач, кој го нарекле BackRub. Тие наскоро сфатиле дека тоа не е баш најдобро име за една технолошка компанија, па решиле да го преименуваат.

Идејата за името Google потекнува од називот  Googol, што е всушност математички термин и го означува бројот 10¹⁰⁰  или една единица зад која следат 100 нули. На Пејџ и Брин им се допаднало името Googol, но тој домен веќе бил зафатен, па си изведувале разни комбинации и на крај дошле до лесно изговорлив и прифатлив збор Google.

Инаку, називот Googol е измислен во 1940-та година од деветгодишниот Милтон Сирота, на молба на неговиот чичко, американскиот математичар Едвард Каснер за книгата “Mathematics and the Imagination”. Тој побарал од својот внук да измисли име за бројот 10¹⁰⁰ , а малиот ги предложил Googol и googolplex.