Како настанал изразот „вересија“?

Сите знаеме за значењето на изразот „вересија“. За жал, голем дел од луѓето и мора да купуваат на „вересија“, односно на почек, на кредит. Во трговските кругови многу позната е и поговорката „Чест секому – вересија никому“.

Како овој израз се вдомил на Балканот?

Одредени записи од времето на Османлиското царство укажуваат дека трговците, долговите на сиромашните ги запишувале во тетратки кои ги нарекувале „вересија“. Оттаму, почнал да се употребува овој израз за купување на одложено плаќање.

Интересно е што во тоа време често се случувало, богатите и моќните лица да им ги платат долговите на сиромашните кои биле запишани во „вересија“ тетратките во  продавниците. Откако тоа ќе се случело, плаќачите ја имале честа да ја искинат страницата на која бил запишан долгот. Сиромашните луѓе никогаш не дознавале кој ги платил нивните долгови, а ни оние кои ги плаќале вересиите не знаеле кому му помогнале.