Каков воздух дишат гостиварци?

Гостивар нема мерна станица со која може да се определи квалитетот на воздухот и нивото на загаденост. Сепак и покрај тоа што не постојат конкретни бројчани показатели, повеќе факти укажуваат на тоа, дека гостиварци дишат загаден воздух.

Непријатниот мирис и чадот надвор особено се чувствуваат во вечерните часови, кога се гледа и „бела завеса“ во воздухот. Голем број домаќинства се затоплуваат на дрва, па загадувањето е поголемо во зимскиот период. Ризик фактор е и депонијата Русино, која е лоцирана премногу блиску до населените места и не ги задоволува стандардите. Тука е и лошата навика на граѓаните често и без особена потреба да ги користат автомобилите низ град.

Изминатата ноќ, според мерењата на Министерството за животна средина, многу високо ниво на загаденост на воздухот имаше во 12 градови во Македонија, меѓу кои и соседно Тетово.

Невидливите загадувачки суспендирани честички се опасни по здравјето на човекот. Според анализата на Светска банка, во Македонија над 1.300 смртни случаи годишно се припишуваат на загадувањето со ситни честички, додека илјадници граѓани добиваат хроничен бронхитис, астма и други болести на дишните патишта.