Каква храна јадеме? Откриени генетски модифициран ориз и соја

Агенцијата за храна и ветеринарство откри две пратки со производи позитивни на ГМО, при реализација на Програмата за мониторирање на безбедноста на храната во Република Македонија, соопшти денес на прес конференција директорот на Агенција, Зоран Атанасов.
-Првата позитивна мостра е од ориз, по потекло од Кочанско, кој е произведен од увозен семенски материјал. Станува збор за количина од 550 килограми. Мострите од оризот се земени од магацин на операторот со храна, односно, количините кои ќе бидат нештетно уништени воопшто не биле пуштени во промет. Кај соини шницли и соини презли во вкупна количина од 510 килограми, исто така со лабораториско испитување е утврдено присуство на ГМО. За нив се чекаат резултатите од суперанализите, кои на барање на операторот со храна се вршат во референтна европска лабораторија. Дел од количините биле пуштени во промет и тие се повлечени и заедно со остатокот во магацинот се ставени под официјален надзор до добивање на резултатите од суперанализата, истакна Атанасов.
Агенцијата за храна и ветеринарство подготвува план за контрола на потеклото на ГМО на годинешнава, нова реколта ориз. Во соработка со Министерството за земјоделство, шумарство и водостопанство ќе се утврдува потеклото на семенскиот материјал ориз кај кој е утврдено присуство на ГМО, односно, ќе се проверува колкави количини, од кои сорти и од кои земји се увезени.

Препознавањето на производите кои содржат ГМО од страна на граѓаните не е можно, ако производите не се декларирани, односно ако не е извршено лабораториско тестирање, рече  Атанансов и најави дека во наредниот период, ќе има засилени контроли за присуство на генетски модифицирани организми во храната.