Каква разврска ќе има аферата „Нефа мебел“?

Неизвесно е дали и како граѓаните кои нарачале и платиле мебел, во сега веќе затворените салони на компанијата „Нефа мебел“, ќе бидат обештетени. Работењето на фирмата ќе го проверува Управата за финансиска полиција, која отвори предистрага по допрен глас од медиумите. Во контрола се вклучуваат и пазарните инспектори. Изминатите денови, до Пазарната инспекција пристигнале голем број пријави и поплаки од измамени муштерии. Инспекторите на терен ќе евидентираат каков мебел и капитал поседува фирмата.

„Граѓаните ги имаат сите документи, може да доаѓаат во пазарниот инспекторат, организацијата на потрошувачи, меѓутоа тука пред се` се работи за класична измама и најверојатно овој случај ќе треба да си го преземе МВР.“, изјави Евгенија Панева, од пазарна инспекција.

Граѓаните кои останаа и без парите кои ги дале и без парчињата мебел што ги нарачале се револтирани. Некои од нив велат дека платиле по 25 и 30 илјади денари, чекале со месеци да им биде доставена нарачката, за на крај да останат со празни раце.

Фирма „Нефа мебел“ без најава ги затвори сите продавници во Србија и Македонија. Руската компанија „Спилит“ која го призведува мебелот што го продава „Нефа“,преку ноќ побегна од Врање и остави долгови и 300 работници без работа

И салонот во Гостивар од пред неколку дена е испразнет и заклучен.

Во меѓувреме српските медиуми пренесоа изјава на рускиот газда на „Спилит“,  Андреј Ходашевич во која тврди дека се собираат пари за да се обештетат купувачите и да се исплатат вработените во Србија.