Какви навики такво срце – Светски ден на срцето

Срцевите заболувања се една од водечка причина за смртност како на ниво на  Македонија така и регионот на Гостивар. Медицината тврди дека 80 % од болестите на срцето може да се спречат со редовни лекарски прегледи, правилна исхрана и физичка активност.

На денешен датум се одбележува Светскиот ден на срцето, а лекарите ги повторуваат своите главни препораки и совети за граѓаните, за да го зачуваат здравјето на овој витален орган. „Секој поединец мора да внимава на исхраната, да избегнува мрсна и тешка храна, брза храна, газирани пијалоци, чипс и слично, а да внесува повеќе овошје, зеленчук, риба, немасно сирење, природни сокови. Секојдневната физичка активност има исто толку значајна улога во превенција на срцевите заболувања колку храната и здравите животни навики. Се препорачува умерено вежбање, пешачење, возење велосипед“, советуваат медицинарите.

Во ризик фактори за појава на здравствени проблеми со срцето се наведува и стресот, состојба против која современиот човек секојдневно води борба.

Статистиката на Светската здравствена организација покажува дека годишно од кардиоваскуларни болести во светот умираат над  17 милиони луѓе, а бројките имаат тенденција на натамошен пораст.