Какви проекти предложија гостиварци на првата форумска сесија?

Отворање на народна кујна, Центар за аутизам, поставување мерни станици за квалитет на воздух близу фабриките, реконструкции во училишта… Ова се дел од проектите кои беа предложени од страна на граѓаните кои учествуваа на првата форумска сесија, во рамки на проектот „Зајакнување на општинските совети” преку кој за Гостивар се обезбедени 50 илјади швајцарски франци. Активностите продолжуваат понатаму, со дискусија околу предложените проекти, на втората форумска сесија, која ќе се одржи следната недела.

Правилата дозволуват финансирање на еден до три проекти, кои ќе бидат избрани на последната, четврта сесија со гласање на граѓаните. Право на глас ќе имаат оние граѓани кои учествувале на најмалку три од сесиите, а избраниот проект треба да опфаќа социјална кохезија.

„Целта е да се зголеми социјалната инклузија во Општина Гостивар и граѓаните да бидат дел од планирање и реализирање на проектите“, изјави Бесим Догани, од општинската канцеларија за локален економски развој.

На првата форумска сесија се обрати и претседателот на Советот на Општина Гостивар, Насир Муслиу, кој истакна дека ваквите проекти се од големо значење за граѓаните и ќе придонесат за подорбување на одредени состојби во општината.

Проектот „Зајакнување на општинските совети” е финансиран од Швајцарска агенција за развој и соработка, а се спроведува преку Програмата за развој на обединетите нации (UNDP).