Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!



  • Дата: 27/04/2019 | 13:52

Какво е значењето на велигденските симболи?

Велигден, како еден од најголемите христијански празници ја носи симболиката на обновувањето на животот, простувањето, будењето на природата. Обичаите и традициите со кои се слави празникот се дамнешни и вече вкоренети кај луѓето како неизбежен дел од велигденското одбележување. Иако се општо прифатени, за некои од нив малку се знае. На пример, кое е значењето на велигденските симболи како јагнето, цвеќето, зајачето, огнот, пеперутката…?

Да започнеме од пеперутката. Пеперутката има неколку фази на развој, и токму преку неа симболично се претставени и фазите од животот на Исус, но и на христијаните. Првата фаза, гасеницата, го претставува земниот живот, човечката преокупираност со обичните, секојдневни нешта, желбата да се задоволат физичките потреби. Гасеницата, исто така го претставува и периодот од животот кој Исус го поминал на Земјата. Следната фаза во која гасеницата се обвиткува во кожурец и не покажува знаци на живот го претставува распнувањето, гробот на Исус Христос, како и смртта која е дел од животот на секој човек. Последната фаза, пеперутката, е симбол на новото раѓање, воскресението, новиот живот во кој нема место за материјалното, каде царува  духовноста, кон која треба да се стреми секој верник.

Велигденскиот оган претставува симбол на сонцето, кое го овозможува животот на Земјата. Со велигденскиот оган се поздравува сонцето како заштитник на плодноста и повторното растење, раѓање.

 

Јагнето исто така е еден од симболите на Велигден. Јагнето ги симболизира христијаните, кои го гледаат Исус како добар овчар кој го чува своето стадо. Јагнето доаѓа на свет во пролет. Израелците ја користеле јагнешката крв за да ги спасат првороденчињата во Египет.

Зајачето најчесто е дел од декорацијата и украсите на овој голем христијански празник. Овој симбол потекнува од пред развитокот на христијанството и  традиционално се поврзува со плодноста и богатството. Постои легенда според која Велигденскиот зајак некогаш бил голема и убава птица и и’ припаѓал на една божица. Еднаш таа се налутила и ја претворила птицата во див зајак и бидејќи тој се уште е птица по душа, продолжува да прави гнезда и да ги полни со јајца. Значењето на самото зајаче е размножувањето и се врзува со желбата да се зголеми бројот на членовите во фамилијата.

Цвеќињата како кринот и белиот нарцис со својата бела боја ја симболизираат чистотата на Мајката Богородица.  Постои и легенда според која нарцисот прв пат изникнал во Гетсиманската градина ноќта на Тајната вечера, за да го утеши Исус во моментите на тага и бол. Расцветувањето се гледа и како симбол на христовото издигнување од мртвите.

Напишете коментар