Каланоски со два погодоци го одлучи победникот во локалното дерби ФК Гостивар – ФК Арсими Чегране (2-0)

По неколкумесечна пауза фудбалот се врати на Градскиот стадион во Гостивар. Во рамки на 11-тото коло во Втората македонска фудбалска лига ФК Гостивар ја пречека екипата на ФК Арсими од Чегране, локално дерби во кое славеше домаќинот со 2-0.

Двете екипи резервирано влегоа во натпреварот, стрпливо градејќи ги нападите. Како минуваа минутите така домаќините го зголемуваа притисокот, но без конкретна закана кон голот на Арсими, се до 33. минута кога по еден центаршут од левата страна, Антонио Каланоски со прекрасен удар со глава погоди за 1-0 и голема радост на домашната публика во Гостивар, резултат со кој се замина на полувремето.

Антонио Каланоски, 33. минута (1-0)

Во вториот дел гостите од Чегране, поконкрено тргнаа кон голот на ФК Гостивар, но притисокот не вроди со резултат, по петнаесетина минути игра гостиварци ја презедоа контролата и се повеќе се играше на половината на гостите, создавајќи неколку шанси во кои недостигаше концентрација во завршницата. Во 74. минута по центаршут овојпат од десната страна Каланоски повторно со глава беше прецизен, постигнувајќи го вториот гол на натпреварот, за конечни 2-0.

Антонио Каланоски, 74. минута (2-0)

За ФК Гостивар ова е осма победа во сезоната, со 27 бодови се наоѓа на 2. позиција, заостанувајќи еден бод помалку од првопласираниот Вардар. Арсими со 13 бодови се наоѓа на 10. позиција на табелата.