Калинка…Сочната црвена убавица

Калинката е овошје кое потекнува од Персија и се користело во исхраната и медицината уште во праисториско време. Култ кон калинката бил развиен во кинеската, египетската и други древни култури. И во денешно време за многумина е омилено сочно овошје. Има и зошто!

Калинката покрај неповторливиот освежителен вкус претставува многу силен сојузник на имунитетот. Вистинска ризница е на витамини кои му се неопходни на организмот во борбата против вирусите и настинките. Изобилува со Ц витамин, неопходен за синтеза на колаген, како и витамин К и фолна киселина. Нутриционистите ја сметаат за „супер храна“ со оглед на тоа што има содржи антиоксидативни состојки кои го намалуваат холестеролот и високиот крвен притисок.

Истражување, кое било објавено во списанието Clinical nutrition покажало дека придобивките за здравјето од калинката и сокот од ова овошје одат во прилог на спречување на ширење на рак на дојка, намалување на ризикот од остеоартритис како и ризикот од болести на срцето и крвните садови.

Оние што сакаат да изгледаат помлади, треба да ја вметнат калинката во своето секојдневно мени. Исто така се препорачува и за жените кои поминуваат низ климактериум.