Кампањата „Одбери стручно-Средно што е вредно“ низ училиштата во гостиварско

Карванот на Министерството за образование и наука за промоција на средното стручно образование, помина низ повеќе основни училишта на поширокото гостиварско подрачје. Беа опфатени училиштата во Вруток, Дебреше, Градец, Маврови Анови и други. Кампањата се води под мотото „Одбери стручно-Средно што е вредно“  и содржи две основни компоненти: едната е информирање на учениците од аспект на можностите што ги нуди средното стручно образование, како стекнување стручни квалификации и употребливо знаење, полесен пристап до работно место и слично, а втората компонента има промотивен карактер, односно претставување на сите струки и образовни профили што ги нудат средните стручни училишта на територијата на нашата земја.

Без факултет нема шанси да се вработам!

Условите во средно не се сменети со години!

Со средно стручно немам иднина!

Ова се едни од неколкуте митови, кои Министерството се труди да ги разбие преку активностие од кампањата, потенцирајќи дека таквите тврдења се пренесуваат од генерации на генерации и ја намалуваат популарноста и интересот за упис во средните стручни училишта.

„Стручното образование значи финансиска независност, сигурна иднина и професионална слобода. Со одбирање средно стручно училиште, не се ускратува можноста за продолжување на образованието на повисоко ниво, напротив на овој начин теоријата добива практична вредност.“, нагласуваат од Министерството.