Каналите во Венеција речиси пресушени

Сувите зимски временски услови во Италија ја зголемија загриженоста дека оваа земја може да се соочи со нова суша по вонредната состојба од минатото лето, откако научниците и еколошките групи предупредуваат дека на Алпите има помалку од половина од нивните нормални снежни врнежи.

Предупредувањето доаѓа по состојбата во Венеција, каде поплавите се вообичаено главниот проблем, сега се соочува со невообичаено ниско ниво на вода што ги спречува гондолите, водените такси и возилата за итни случаи да пловат по каналите.

За проблемите во Венеција се наведува комбинација на фактори – недостаток на дожд (и други врнежи), системи со висок атмосферски притисок, полна месечина и морски струи.

„Италијанските реки и езера страдаат од сериозен недостиг на вода“, истакна еколошката организација „Легамбиенте“ и повика на посебно внимание на северот на земјата. По, најдолгата река во Италија која тече од Алпите во северозападниот дел на земјата до Јадранот, има 61 отсто помалку вода од вообичаеното во овој период од годината, се додава во соопштението на еколошката групација.

Да потсетиме, минатото лето, во јули, Италија ја погоди најтешката суша во последните 70 години, а беше прогласена и катастрофална состојба.