Кандидатите за градоначалник на Гостивар потпишаа Кодекс за фер избори

Попладнево во просториите на Општинската изборна комисија на Гостивар, кандидатите за градоначалник, ставија свој потпис на Кодексот за фер и демократски избори, согласно Изборниот законик. Со потпишувањето, тие се обврзаа дека ќе ги почитуваат законите, правилата и прописите кои се однесуваат на изборниот процес и кампањата и дека нема да вршат притисок врз вработените во дражавна и јавна администрација, институции и установи и претпријатија со државен капитал, ниту да дозволат граѓаните да бидат предмет на закана.

Кодексот во Гостивар го потпишаа: Невзат Бејта (ДУИ), Дафина Стојаноска (ВМРО-ДПМНЕ), Асаф Адеми (БЕСА), Себајдин Изаири (ДПА), Арбен Таравари (Алијанса за Албанците) и Шпат Исеини (Коалиција НДП-Унитети). Кандидатот од СДПМ, Ленка Јованоска не беше присутна на настанот. Од Општинската изборна комисија рекоа дека таа претходно ги информирала дека е спречена да присуствува поради одредени приватни причини.