Кавги и проблеми во Гостиварски театар, прекината пробата на премиерната претстава

Постои една година, се` уште се екипира со кадар, немал премиера, а во Гостиварски театар веќе се случуваат проблеми и превирања.

Актерите Берат Салиу и Арѓент Хасани во знак на револт, поради одземање на улогите, вчеравечер влегоа на сцената и ја прекинаа пробата на претставата „Мудриот Натан“, која треба да биде прва на театарот. Тие од режисерот и од директорот побараа објаснување зошто се отстранети од претставата и заменети со други актери. Рекоа дека таквиот чекор бил сосема неправеден и дека нема да дозволат претставата да се одигра без нив.

„Без да не известат, не тргнале од претставата и не замениле со други актери. Немаат право на такво нешто и ние нема да дозволиме претставата да се одигра без нас. Дојдовме да ги прашаме од која причина го направиле тоа. Арѓент има и договор со театарот, јас немам затоа што кога се формираше театарот бев именуван за в.д директор.“, рече Салиу.

Неговиот колега Хасани го има истиот став и револт: „Итно барам да објаснат зошто сме сменети, на наше место се донесени актери од Тетово. Јас не сум против никого, театарот треба да има отворени врати за сите уметници , но не тоа да се прави на ваков начин“.

Режисерот Сулејман Рушити рече дека претставата е негов авторски проект и како таков добил финансиска поддршка од Програмата за култура на Министерството. „Актерите коишто прават скандали не ги исполнуваа своите обврски. Подготовката на претставата ќе си продолжи и тоа никој не може да го спречи“, изјави Рушити.

Според в.д директорот Висар Вишка, актерите постапувале непрофесионално и ги попречувале пробите. И тој потврди дека екипата под водство на Рушити ќе продолжи со работа на претставата и најави дека освен оваа, до крајот на годината Гостиварски театар ќе постави на сцената уште две драмски изведби.