Казни и сообраќајна поука за пешаци во Гостивар кои претрчувале улица

Вчера (28 јуни) од 9 до 14 часот, на подрачјето на СВР Тетово спроведена е акциска контрола за прекршоците што ги прават пешаците. При контролата откриен и законски санкциониран е 21 прекршок, од кои 14 во Тетово и 7 во Гостивар. Дваесет од нив се однесувале на преминување на улиците надвор од обележани пешачки премини, а еден на непочитување на светлосни сообраќајни знаци.

На сите прекршители им се изготвени поднесоци и покани за присуство на сообраќајни поуки, кои наскоро ќе бидат организирани за нив, информира полицијата.

Секторот за внатрешни работи Тетово со совет и потсетување до пешаците целосно да се придржуваат кон сообраќајните правила, знаци и прописи, да не ги минуваат улиците каде ќе стигнат, туку исклучиво на обележани премини, да не се задржуваат на коловоз, а на улици на кои нема оформени тротоари да се движат по работ од коловозот спротивно на движењето на возилата.

До возачите, пак, се апелира секогаш да им даваат предност на пешаците и пред обележани премини да ја намалат брзината, особено пред јавни објекти, зашто обично тука е и најголема фрекфренцијата на возила и пешаци.