Казни за 20 пешаци во Гостивар кои претрчувале улица

Во рамките на континуираните активности што ги презема СВР Тетово за поголем ред и безбедност во сообраќајот на тетовско-гостиварското подрачје, вчера (21 септември) од 9 до 14 часот спроведена е акциска контрола на пешаци, во која вкупно биле откриени и санкционирани 39 прекршоци. Од нив 19 во Тетово и 20 во Гостивар. Сите пешаци небезбедно ги преминувале улиците надвор од обележани пешачки премини. При контролата, исто така, биле санкционирани и 11 други видови прекршоци.

Полицијата информира дека паралелно со оваа, деновиве во Тетово и Гостивар се реализираат и засилени активности околу паркирањето, посебно на улиците кои водат кон училиштата, но и во централните градски подрачја. „Погрешно паркираните возила и пред се оние кои го попречуваат нормалното и безбедно движење на другите учесници во сообраќајот, возила или пешаци, веднаш се санкционираат и подигнуваат од „пајак-службите“. Во наредниот период  ваквите активности уште повеќе ќе се интензивираат. Само вчера (21 септември) во Тетово и Гостивар биле подигнати десетина погрешно паркирани возила.“, извести СВР.