Казни за немање зимска опрема во возилата во акција во Гостивар и Тетово

На подрачјето на СВР Тетово вчера (5 декември) од 8 до 14 часот спроведена е акциска контрола на возилата, пред се на нивната техничка исправност. При контролата биле откриени и 5 возила (ТЕ-3 и ГВ-2) со неисправни сопирачки, 1 (ТЕ) со неисправни други системи, 5 возила (ТЕ-2 и ГВ-3) кои не поседувале адекватна зимска опрема и 2 со истечена регистрација (ТЕ-1 и ГВ-1).

Сите технички неисправни возила веднаш се исклучени од сообраќај и на возачите им се изготвени предвидените поднесоци со парични глоби кои, зависно од видот и карактерот на утврдениот прекршок, се движат од 50 до 400 евра во денарска противвредност, извести полицијата.

При контролата, исто така, санкционирани се и 5 лица кои ги управувале возилата без соодветна дозвола, 2 возачи-почетници кои не се придржувале на законските ограничувања за оваа категорија возачи, 1 возач со впишана забрана за управување, 1 возач поради неносење  на возачка дозвола, како и 4 кои непрописно, односно погрешно ги паркирале возилата.

Секторот за внатрешни работи Тетово повторно со повик и апел до возачите редовно да ја проверуваат техничката исправност на возилата, посебно оние кои учествуваат во јавниот превоз на патници, да не седнуваат зад управувачот без претходно положен возачки испит, задолжително да поседуваат зимска опрема доколку планираат патување кон Маврово, Стража или Попова Шапка и да внимаваат како и каде ги паркираат возилата.