Казни за педесетина граѓани во Гостивар кои не носеле заштитни маски

Последните три дена, на подрачјето на Гостивар 51 лице „заработиле“ казни поради непочитување на владината уредба за носење на заштитна опрема на лицето. Според податоците од Секторот за внатрешни работи Тетово, по тој основ во петокот биле изготвени 20 прекршочни платни налози, во саботата 8, додека во неделата 23. Контролите на полицијата и понатаму продолжуваат секојдневно.

Уредбата на Владата предвидува задолжително носење на заштитна опрема на устата и носот во затворен простор на сите јавни објекти како државни институции, маркети, продавници, банки, пошти, јавен превоз, чекални, здравствени институции и слично, како и на отворени простори, секогаш кога не може да се одржува минимална дистанца од два метри меѓу граѓаните.

Казните за непочитување се во висина од 20 евра во денарска противвредност за физичките лица, а за компаниите каде не се почитуваат мерките за носење заштитна опрема за вработените и посетителите, предвидена е казна од 2.000 евра во денарска противвредност.

На државно ниво изминатото деноноќие биле регистрирани 525 прекршоци за неносење маски.