Ќе има ли нови рестрикции и карантини за Велигден и Рамазан?

Од вечерва ограничувањето на движење на граѓаните почнува од 20 часот, а од утре важи забраната за служење гости во кафулиња, ресторани, пицерии и слично. Новите рестриктивни мерки, кои Владата ги воведе важат две недели, што значи до 20, односно 21 април. Најжешка тема на муабет меѓу граѓаните во Гостивар денес беше дали ќе следуваат плус дополнителни рестрикции и карантини за време на велигденските празнувања и во текот на рамазанските пости.

Од надлежните за сега, единствено има објаснување за актуелно воведените мерки и апели до граѓаните да ги почитуваат за да се спречи ширењето на вирусот, процес кој е во критична фаза.

„Што е тоа што сакаме да спречиме. Имајќи го предвид искуството од минатата година кога ваквите празници во истиот период, сериозно ја искомплицираа и ја усложнија епидемиолошката ситуација, сметаме дека доколку тоа сега се случи со веќе оптоварен здравствен систем, ќе биде кризна ситуација што тешко ќе се менаџира. Тоа е причината зошто се воведоа новите рестриктивни мерки, значи со цел овој трет и досега најсилен бран на ковид-19 на некој начин забрзано да го завршиме. Да се намали притисокот врз болниците, да се намали ширењето. Верувам дека граѓаните ќе се придржуваат до сите овие мерки. Мора да сме свесни дека со сопственото однесување, одговорност, придонесуваме за што поскоро да заврши и овој бран“, изјави министерот за здравство Венко Филипче.

Заменик-министерот за здравство Илир Хасани на вчерашната прес конференција наведе дека ако не се донеле одлуките за построг полициски час и затворање на локалите, со сигурност ќе сме се соочеле со затворање за празниците Бајрам и Велигден.

„Се надеваме дека тоа нема да се случи, и се надеваме дека големите верски празници ќе ги поминеме без вакви значителни ограничувања. Сепак граѓаните, во време на празниците и празнувањата ќе мора да внимаваат, затоа што традиција е да се оди во домовите на повозрасните, а тоа се најризична категорија граѓани, бидејќи вирусот за нив е најфатален. Секој од нас има индивидуална одговорност во битката со овој вирус и штитејќи се сами, ги штитиме и нашите најсакани. Овие мерки кои ги преземаме, иако се многу непопуларни, целта ни е да го намалиме притисокот кон болниците, но и да го спречиме ширењето на вирусот, бидејќи британскиот сој се испостави дека е најопасен до сега“, посочи Хасани.