Ќе се намалуваат трошоците за извршители и нотари

Со измените на Законот за извршување и на Законот за нотаријат, ќе се скратат трошоците кои граѓаните ги плаќаат за нотарски услуги и на извршителите.

Според симулациите кои во оваа насока ги презентираше министерката за правда Рената Дескоска, за сметка за вода, смет и одржување на заеднички простории од 3.000 денари досега се плаќаа вкупни трошоци од 3.490 денари за награда, судска такса,  адвокатски трошоци, материјални трошоци, клаузула за правосилност и извршност, додека со измените вкупните трошоци ќе бидат 550 денари.

За сметка од 11.000 денари за струја и парно кај нотар наместо 5.770 денари, ќе се плаќа 750 денари. За долгови до 1.000 евра, трошокот за деблокирање на банкарските сметки од 20 евра се намалува на 2 евра, а за поголеми долгови ќе се плаќа најмногу 6 евра.

Нотарската награда ќе изнесува 10% од главниот долг, но не повеќе од 500 денари. Наградата за извршител за долгови за комуналии пак, не може да изнесува повеќе од 20% од висината на главниот долг.

Новите тарифи ќе ги опфатат и започнатите постапки пред нотари и извршители доколку трошоците не се веќе наплатени.