Ќе се засилат полициските патроли во училиштата во Гостивар

Заради поголема безбедност на децата во училишните средини на гостиварското подрачје, во наредниот период ќе се засилат полициските патроли во образовните установи. Ова беше најавено на последниот состанок на Локалниот совет за превенција што се одржа деновиве. Освен зголемено полициско присуство, началникот на ОВР Гостивар Абдил Биљали најави и случајни утрински контроли по училиштата.

„Ние како полиција преземаме мерки, но ќе има зголемено присуство на полицајци за да се осигура безбедност за децата. Добро е да се одржуваат и средби со сите засегнати страни за да превенираат непријатни појави и ризици. Полицијата ќе ги зачести патролите, а ќе спроведуваме и утрински случајни контроли.“, рече началникот Биљали.

На состанокот се разговараше и за оштетувањето и уништувањето на урбаната опрема во парковите, шеталиштето крај Вардар и други јавни површини. При тоа беше речено дека е потребно да се инсталираат безбедносни камери за да се превенираат ваквите вандалски чинови, кои не се ретки.

Главна тема на расправа на Локалниот совет за превенција, како што веќе информиравме беше нечистотијата и загадувањето во Гостивар и околината предизвикано од градежните работи на Коридорот 8.