Кевин Пантер сепак ќе го предводи Партизан уште две сезони

Информацијата која ја пренесоа скоро сите европски медиуми дека еден од најдобрите бекови во Евролигата, американецот со српски пасош Кевин Пантер од Партизан преминува во Барселона, денеска беше и официјално демантирана од страна на „црно-белите“.

Капитенот на кошаркарите на Партизан го продолжи договорот за уште две години, соопшти белградскиот клуб.

Најбараниот кошаркар летово, со тоа стави точка на шпекулациите кои циркулираа изминатите денови дека американскиот кошаркар ќе го напушти Белград.

Според информациите кои ги пренесе Sportske.net, годишната плата на Пантер во Белград е меѓу 1.600.000 и 1.900.000 евра, а понудата е во опсег од 3.200.000 до 3.800.000 евра за две сезони. Капитенот на црно-белите требаше да постигне договор со Барселона, која му понуди двегодишен договор вреден 6.000.000 евра бруто или 4.200.000 евра нето.

Пантер сезонава го предводеше својот тим до седмата титула во регионалната АБА лига, прва по една деценија, и беше прогласен за најкорисен играч (МВП).

Тој, исто така, беше еден од клучните кошаркари за пласманот на Партизан во четвртфиналето во Евролигата, во кое белградскиот клуб испушти водство од 2-0 во серијата до три победи против Реал Мадрид.